繼續懶惰我的還要很夜起床. 很想溫書做功課但係真係最后還是被魔鬼佔據左. 想身沖涼 gel 頭靚仔後, 食左細路爸爸整的愛心早餐, 有好多熱香餅, 薯餅, 炒蛋, 面包等. 食到好飽, 不過見到佢地每塊熱香餅都用半公升糖漿就覺得有點可怕. 佢地好鐘意食甜野, Donut / 朱古力 / 薯片果 d, 變肥佬唔緊要, 最怕佢地變糖尿..
以為出去了, 點知靚仔走左去玩機動四輪車 4×4, 佢地叫依d車做 ATV. 渣落好似電單車咁 (用腳 tick 波段, 用手殺前後輪同埋加油). 力水唔錯, 有五個波段, 因為第一次渣關係同埋我唔想出事, 所以我只用到三波. 佢地係 d 沙度玩飄移同埋單邊車輪行駛我都無試. 事後知到是二百幾 cc 的, 唔怪得咁有力水. 渣渣下幾個小朋友幫手執下屋附近 d 垃圾, 佢地咁乖仔我都幫手執下. 落車後個頭比頭盔整扁了, 算了反正長到點 Gel 都唔多好睇.
回去仲有時間, 看下 movie 同埋睇下靚仔 d 生活Movie. 佢地教育制度真係好唔同, 細細個就有好多公眾表演機會 (靚仔們帶貓貓狗狗表演囉晒獎), 上堂又會好多機會做科學實驗 (好似陳易希果 d 整機械玩意), 是有很多機會發揮創意才能的. 加上佢地老豆老母又容許佢地出街手多多, 買野番黎又由佢地拆爛佢再砌番佢, 這些文化不同令西方小朋友和東方小朋友真係好大分別. 我地上堂講多句野都比老師小話攪事, 造成我地不敢多問多講的性格. 好多野都係心裡面想, 想完一矢中的的講個答案出黎 (VS 鬼仔遊完花園先講答案). 各有各好, 但係而家公司要上位要見客, presentation 很重要, 鬼仔在這裡是有著數的, 起碼老細比較上黎, 一個講得出阿媽係女人好過另一個唔出聲. 東方人要上位, 要後天努力了!
等多陣, 集齊人 (同埋佢地另一家庭和果兩位中國夫婦) 一行人出去了野生之旅了. 首先車了幾分鐘去了一個很大的農場, 那裡有很多 Black Angus Cow. 見到 Angus 依個字, 大家都知道那裡的牛是養黎食的. 佢地話一頭囉黎繁殖的牛可以賣二萬蚊美金, 或者囉佢的精液賣出去都可以賣一萬. 那個農場有幾萬畝地, 入面有 N 既 N 次方咁多隻牛, 應該是很有錢的. 我諗諗下不如番鄉下養牛算了.
去完睇牛後車了幾分鐘去了睇馬仔, d 馬仔好細隻, 我覺得似驢仔多一點. 靚仔靚妹係地下執 d 草比佢地佢地就會走過來, 整到污糟晒老豆老母都唔管, 真是好.
之後又渣車去了睇果度條大河同堤壩. 風景很靚的, 不是說笑有點似瑞士 Luzern 一帶. 上到上游我們喂了鴨仔和鵝仔, 但係多數面包比可惡的海鷗食了. 果度又大風又凍, 真係想死. 玩完都夜了, 同另一家人分道揚鑣. 當中介紹了一些荒廢的工廠. 那裡曾經有一個全世界最大的練鋼廠. 但係十多年前倒閉了, 我 host family 的大家庭都有好幾個男丁失業. 還有其他工廠都失業了, 女士們都失業. 他們有些在附近其他地方工作, 有些重投學堂, 有的開舖做小生意, 有些不再做野等等. 雖然大家都有工作, 但我開始感到美國經濟的問題, 可能在小鎮人不多, 只要肯做都可以搵到工作, 不像香港那般三四十歲失業果種慘烈.
我地自己去了男戶主工作的地方看. 之前說過男戶主係做建築工程機械的設計師. 講正確一點他是設計一些 Filter, 是將一埋沙石和廢鐵堆分開 (用大磁鐵和其他野) 將佢地分門別類, 之後將分開左 d 野囉去賣錢. 去到果度泊了很多很大的機器 (看過 Transformer 2 最后五合一的大怪物嗎??). 他開動了一部最大的機器給我玩, 我玩了一會, 很有趣. 那些東西要賣四十萬美金一部, 屋主是由頭到尾的設計師, 很強勁呢.
之後去了女屋主父親的蠟燭舖頭, 入面很多好靚好香的蠟燭制品. 參觀了他的小工場了解如果製造蠟燭, 知道如果由頭製造不同型狀的蠟燭, 學到不少野. 他送了一舊很重的蠟燭給我, 很是多謝.
繼續去了女屋主之前任職的餐廳吃東西再去了她工作的 wal-mart distribution centre 看看. 天黑了便回去家. 同佢地上網打 wii 的 COD Black OPS. 雖然無 xbox360 咁好控制同埋畫面差九皮, 但係打熟 d Map 番黎升 level 都快一點.
