九十之七十 Bye Bye 啦阿妹

昨晚已知今天行程是去教會之後一點三就坐車回芝加哥. 廢事樣衰我都係晨早起左身沖涼執野. 等佢地既時間之際我上了 Google Street Map Show 比佢地睇我住的地方同埋工作的地方, 佢地見到我屋企條街都說了 ‘O my godness’, 我話我住果度已經係 suburb 佢地已覺得唔住得人. 之後再上 youtube 找了幾段西洋菜街人山人海的片段給他們看, 不知會否嚇到佢地唔敢來香港? 最后上了 openrice 比了一些 Chinese Food 佢地睇, 原本想教埋佢地用筷子但沒有時間了.

去到教堂, 幾個靚仔去了小童的主日學. 我和爸爸去了成人的主日學. 間房有五六個人 (另外幾個 international student 都係度), 佢地係度讀聖經同埋討論下咁 (就好似我小學時番的主日學一樣). 今日的課題係講 facebook 等電子社交網令人和人的關係疏遠了. 哈哈不知是否上帝的安排這個 topic 又開正我果瓣. 我又講了 ‘facebook生日炸板’ 的偉論, 問心幾多人真係會記得你生日, 幾多人炸你板同你講生日快樂時是真心的. 各人有各人喜好, 小弟重的是質不是量. 不過 facebook 等工具對分隔異地的人來說是好過無, 就好像我回香港後, 沒有這些工具大家都不會知道大家幹什麼 (除了記明信片之外).

主日學完畢, 去了禮堂崇拜, 個個都熟口熟面的. 平時好頑皮的靚仔幫手點蠟燭, 之後菲律賓人主持, 唱詩等等. 幾歲既小朋友出黎唱歌同埋講故仔, 好鬼 cute. 得閒又企下起身, 得閒祈下禱, 之後突然間大家周圍走握下手講 Good Morning 傾下幾句咁. 以為崇拜完畢點知一分鐘之後大家又番埋位繼續. 大家 share 下有咩要同神講之後, 背下主禱文 (我仲記得中文板的), 最后大家手拖手祈禱之後便完結了. 可能大家都是神的兒女, 大家都好 nice 乜都吹水吹一餐. 我覺得如果流落他鄉人生路不熟, 去下教會可以識到好多熱心朋友同埋練下英文 (你講到屎一樣都唔會笑你). 當然你個人本身是要善良的 (一定要好似我咁善良, 仲記得中學時有某幾邪惡男同學去教會識女朋友).

完結後, 大家幫手 Hang the Green (幫教堂扮靚掛聖誕東西), 我當然出一分力. 人多的關係不消一會便把教堂弄得靚靚的. 大家食完教友預備的午餐後, 便交換 email/FB 影下相並出發去集散地.

去到集散地, 又是哪些生離死別擁抱這分鐘的情況. 幾個小朋友未見過單層大巴覺得好新奇, 很開心咁走上去察看一番. 我告訴他們香港的巴士比這些更大仲有兩層, 他們都很好奇, 畢竟他們真的是在小鎮長大沒有接觸外界. 依依不捨等 touching 的情境唔係我個 Type, 我不會講了, 自己想像一下吧.

回程時同左幾個國內的人吹水, 真係唔係講笑, 黎美國兩個幾月英文無乜進步, 反而同普通話人溝通好左. 交談間知道國內人到了美國後心理上的變化, 文化沖擊等. 他們都成四十歲, 有家庭有小朋友, 他們教我怎樣對待在美國的experience 和 homestay 的經歷. 做得好的足以令你人生打開新一頁云云. 同老人家吹水又有野袋落袋~

帶了的case study 同埋 notes 都係無睇過, play hard 四日之後又變了 study hard 時候, 看那破產 Enron 公司50 頁的 case 看到我想燒左佢. 回去 downtown 後立即趕去同組員傾吹水科的 final presentation. 很唔 efficient 地傾左三個鐘大家都要分工好仔細唔想蝕底. 我又攰又囉住好多野很想快點回家. 回程時和兩位非洲同學 (一個喀麥隆, 一個剛果) 傾下計, 佢地都曾是法國殖民地所以法文好勁, 問多兩問兩個都是踢波的, 我心想應該同 Eto 依杜奧 差唔多的, 相識太遲如果唔係同佢地踢下波.

係巴士上撞到德國女同學, 大家傾了兩句 Thanksgiving 做過乜野之後, 送了佢去屋企附近的 Pizza 店, 自己去了買中國飯食. 坦白講這幾天除了個好似 McDonald 的早晨全餐好好食之外, 其他全部野食完等如無食, 好辛苦..